ТЕРМА ЖАМОАМИЗ КАМОНДАН ОТИШ БЎЙИЧА ОСИЁ ЧЕМПИОНАТИДА МУНОСИБ ИШТИРОК ЭТДИ! 24.11.2021 21:46
Аввал хабар берилганидек, жорий йилнинг 11 ноябридан 21 ноябрь кунига қадар, Бангладеш Республикасининг Дакка шаҳрида Камондан отиш спорт тури бўйича Осиё чемпионати мусобақаси бўлиб ўтди.
Мусобақада Осиёнинг 16 давлатидан сараланган спортчилар ғолиблик учун ўзаро куч синашди.
Чемпионатнинг илк кунида ҳамюртимиз Содиқов Амирхон мерганлик маҳоратини намойиш этиб, халқаро тоифадаги спорт устаси меъёрини бажариб, 656 балл тўплагани қувонарлидир. Таъкидлаш жоизки, бугунги кунда мамлакатимизда 6 нафар спортчимиз халқаро тоифадаги спорт устаси унвонига эга.
Шунингдек, терма жамоамиз, Олимпия турлари, эркаклар ва аёллар ўртасида жамоавий беллашув ҳамда микс турларида (аралаш жамоалар) ҳам ажойиб натижаларга эришди. Қизғин ва муросасиз кечган беллашувларда спортчиларимиз умумжамоа ҳисобида 16 та давлат орасида фахрли 4-ўринни қўлга киритди. Терма жамоамизга бўлажак мусобақаларда бунданда юқори ўринларни эгаллаб, жаҳон саҳнасида Ўзбекистон байроғини баланд кўтаришларини тилаб қоламиз!
